Segja þjónustusamninginn hafa átt sér langan aðdraganda

Fyrirtækið tilkynnti í janúar að til stæði að taka upp gjaldtöku á bílastæðum við flugvellina á Egilsstöðum og Akureyri. Því var frestað eftir mótmæli.

Í lok maí var hins vegar tilkynnt að gjaldtakan væri fyrir dyrum. Hún hefst á þriðjudag, 18. júní. Einu breytingarnar eru að einnig er tekin upp gjaldtaka við Reykjavíkurflugvöll og frítt er að leggja í fimm tíma í stað fimm mínútna.

Jón Jónsson, lögmaður á Egilsstöðum, hefur ritað greinar á Austurfrétt þar sem hann hefur lýst efasemdum um heimildir fyrirtækisins til gjaldheimtunnar auk þess sem hann vann í síðustu viku lögfræðiálit fyrir Múlaþing þar sem þær eru enn frekar dregnar í efa.

Jón hefur meðal annars lýst því að heimildir skorti í samningum ríkisins við Isavia, þar sem Isavia sé aðeins umsjónaraðili flugvallanna og þeirra mannvirkja sem þeim tengjast en ríkið eigandi þeirra.

Tíu dagar er síðan nýr þjónustusamningur var undirritaður. Á fundi sveitarstjórnar Múlaþings í síðustu viku sögðu fulltrúar samninginn hafa verið gerðan í „í leyni“ og furðuðu sig á því að skrifað væri undir hann í því andrúmslofti sem ríkti.

Af þeim sökum hefur Isavia komið fram áréttingu, eins og tekið var fram í fréttum Austurfréttar á föstudag, að fyrri samningur hafi runnið út um síðustu áramót. Bætt er við að nýi samningurinn hafi verið tilbúinn til undirritunar í febrúar. Um sé að ræða hefðbundna endurnýjun sem sé afrakstur vinnu sem hófst fyrri part síðasta vetrar.

Í svari við spurningu Austurfréttar segir að ákvæði hafi verið til gjaldtöku á bílastæðum í fyrri samningi en skerpt á því í þeim nýja.