Austfirðingar atkvæðamiklir á Handverkshátíðinni
Ferð á Handverkshátíðina á Hrafnagili er fastur liður fyrir marga Austfirðinga í ágúst, bæði til að sýna verk sín og skoða það sem í boði er. Við bætist að annar framkvæmdastjóra hátíðarinnar í ár er að austan.„Við erum ráðnar til þriggja ára til að halda utan um hátíðina og útlit hennar. Við stefnum á að þróa hátíðina á næstu árum. Hún verður með hefðbundnu sniði í ár og svo skoðum við framhaldið,“ segir Heiðdís Halla Bjarnadóttir.
Heiðdís Halla rekur grafísku hönnunarstofuna Dúó ásamt Kristínu Önnu Kristjánsdóttur og í samvinnu við félagasamtök í Eyjafjarðarsveit halda þær utan um Handverkshátíðina, sem opnaði klukkan ellefu í morgun. Yfir 100 sýnendur eru á hátíðinni sem stendur til sunnudags.
Austfirskt handverksfólk hefur gjarnan lagt leið sína á hátíðina. Af Austfirðingum sem eru á hátíðinni í ár má nefna Ethic frá Neskaupstað, Sköpunarmiðstöðina á Stöðvarfirði og Ingu Rós Unnarsdóttur undir merkinu Frá Héraði en hún hefur getið sér góðs orðs fyrir að lita garn. Heiðdís Halla segir að slík handiðn sé nokkuð áberandi á sýningunni í ár.
Hátíðin er nú haldin í 27unda sinn og dregur að sér fjölda gesta. „Hún ber upp á sömu helgi og Fiskidaginn á Dalvík þannig það er margt fólk á svæðinu. Um 6000 manns borga sig inn á hátíðina og sumir þeirra kom aftur og aftur yfir helgina.“
Markmið hátíðarinnar er að sýna gestum grósku og fagmennsku í íslensku handverki um leið og sýningin veitir innblástur og kveikir áhuga á hefðbundnum handverkshefðum. Meðal þess sem líta má á hátíðinni í ár er heimasmíðaður lírukassi. Um 30 nýir sýnendur eru á hátíðinni í bland við fasta liði.
Heiðursgestur hátíðarinnar í ár er Hreinn Halldórsson, alþýðulistamaður frá Akureyri sem skapar tréskúlptúra/styttur. Nokkrar nýjar styttur sem hann hefur ekki sýnt áður munu prýða útisvæði hátíðarinnar.
Fulltrúar Sköpunarmiðstöðvarinnar á Stöðvarfirði á Handverkshátíðinni í morgun. Mynd: Heiðdís Halla Bjarnadóttir
