Flugu austur með pizzaveislu
Lífið • This email address is being protected from spambots. You need JavaScript enabled to view it. • Fyrst birt 03. maí 2018 15:11 • Uppfært 03. maí 2018 15:14
Æstur aðdáandi Dominos pizza á Egilsstöðum fékk ósk sína uppfyllta þegar fyrirtækið sendi úrval af uppáhalds flatbökunum hans austur. Hann á sér þó þá ósk að keðjan opni stað eystra.
„Mér finnst þetta góðar pizzur og fannst tækifæri fyrir meiri fjölbreytni í veitingaflórunni hér, eins og er að gerast,“ segir Oddur Logi Reynisson, Dominos aðdáandi.
Eftir ferð á Akureyri í desember sendi Oddur Logi hvatningu á fyrirtækið um að opna stað á Egilsstöðum. Skeytin urðu reyndar fleiri en eitt og loks kom í ljós árangur.
„Eftir að ég sendi póst í síðustu viku um fjölgun íbúa á svæðinu þá spurði markaðsstjórinn hvort hún ætti ekki að koma austur með pizzaveislu og ég sagði já við því.“
Anna Fríða Gísladóttir, markaðsstjóri Dominos, kom með hádegisfluginu á mánudag með sendingu til Odds og vina hans sem hittust á Aski Taproom.
„Ég hélt þetta ætti bara að vera lítið en svo vatt þetta upp á sig og varð alltof stórt fyrir íbúðina mína,“ segir Oddur.
Hann vonast til að þrýstingur hans hafi orðið til þess að koma Austurlandi á Dominos kortið. „Ég fékk þau skilaboð frá forstjóranum að Egilsstaðir væru komnir ofar á listann ef bætt yrði við stöðum á landsbyggðinni þótt þess sé ekki að vænta á næstunni. Þetta er keðja sem virðist ganga út um allt land nema hana vantar á Austurland.“
