„Í augnablikinu étur hann blómið hennar mömmu“
Líklegt verður að teljast að elsta kanína landsins sé búsett í Neskaupstað. Kanínan Zoro er þrettán ára gömul en þær verða að meðaltali 7-9 ára.
„Við erum ekki með neinar sannanir en ég efast um að það séu margar aðrar kanínur á hans aldri lifandi hérlendis. Hann hefur aldrei gert flugu mein og ljúfara dýr er ekki hægt að finna“ segir Agnes. Zoro er ekki hafður í búri, heldur fær að vera frjáls í húsinu og fara út í garð þegar honum hentar og veður leyfir. Hann er orðinn blindur núna en annars í fullu fjöri og leikur sér enn með bolta.
„Hann borðar bara það sem hann vill borða“
Forvitnilegt er að vita hvað veldur svo háum aldri Zoro, hvort hann hafi í gegnum tíðina fengið einhverja ofurfæðu. „Hann borðar bara það sem hann vill borða en hann hefur orðið mjög matvandur á sínum efri árum. Meðan hann var yngri vorum við dugleg að tína fíflablöð yfir sumarið sem við svo frystum og áttum yfir veturinn. Einnig fékk hann hey. Í dag er hann alveg hættur að vilja fíflablöðin og í augnablikinu étur hann blómið hennar mömmu. Það er líklega eitthvað í því sem hann þarf,“ segir Agnes.
