Jólin byrja í Dalahöllinni
Jólamarkaður Dalahallarinnar (reiðhöllin í Norðfirði) verður haldinn í 10. sinn laugardaginn 16. nóvember, frá kl. 12.00 - 17.00. Það er æskulýðsnefnd hestamannafélagsins Blæs og stjórn Dalahallarinnar í Norðfirði sem standa fyrir markaðnum.
Jólamarkaður Dalahallarinnar hefur skapað sér sess í Fjarðabyggð sem táknrænt upphaf jólanna. Fjölskyldufólk af öllu Austurlandi kemur á markaðinn, enda margt í boði: Söngur og skemmtiatriði, harmonikuleikur og blásarasveit.
Fjölmargir aðilar leigja sölubása (borð) á markaðnum og þar má finna flest sem í boði er á mörkuðum sem þessum , allt frá flatbrauði yfir í hreindýrakjöt, prjónavörur og annað handverk. Hestamenn sjá svo um veitingarnar, kaffi, kakó, og allskonar!
Vinsældir jólamarkaðarins hafa aukist ár frá ári. Til gamans má geta þess að þegar hann var haldinn í fyrsta sinn var aðeins einn sölublás, en að þessu sinni verða þeir þrjátíu — plús!
Mynd: www.fjardabyggd.is
