Tinna Kristbjörg hlýtur hvatningarverðlaun TAK 2018
Lífið • This email address is being protected from spambots. You need JavaScript enabled to view it. • Fyrst birt 05. okt 2018 14:58 • Uppfært 05. okt 2018 14:59
Tinna Kristbjörg Halldórsdóttir hlaut í vikunni hvatningarverðlaun Tengslanets austfirskra kvenna fyrir árið 2018. Tinna hefur í starfi sínu sem verkefnastjóri hjá Austurbrú greint tölfræði sem skilað hefur áhugaverðum niðurstöðum um stöðu kvenna á Austurlandi.
Verðlaunin eru veitt konu á Austurlandi sem talin er hafa sýnt frumkvæði og áræðni í atvinnulífi, menningu og samfélagi ásamt því að skara fram úr í störfum sínum í þágu kvenna. Einnig liggur í verðlaununum hvatning að halda áfram því góða starfi.
Í rökstuðningi valnefndar segir að Tinna hafi með elju sinni og áhuga stutt við margskonar félgasstörf, íþróttaiðkun og menntun ásamt því að kynna Austurland og stöðu kvenna í tölum og myndum.
Tinna ólst upp á Þórshöfn á Langanesi en kom austur að loknu háskólanámi og starfaði fyrst við Menntaskólann á Egilsstöðum.
Tinna hefur starfað lengi við kennslu og aðstoðað marga við lokaritgerðir og prófundirbúning. Hún hefur mikinn áhuga á tölum og tölfræði sem hafa skilað áhugaverðum niðurstöðum um stöðu kvenna á Austurlandi. Meðal annars flutti hún erindi á ráðstefnum sem sýndi launamun kynjanna á Austurlandi.
Tinna hefur áhuga á mismunandi hreyfingu. Hún stóð að stofnun „Simply Yoga“ og kennirjóga á Egilsstöðum. Hún kom einnig að stofnun Kraftlyftingafélags Austurlands sem nýverið opnaði aðstöðu á Neskaupsstað. Þá er hún mikill göngugarpur og dugleg að ganga á fjöll.
Tinna lætur ekki sitt eftir liggja í skapandi greinum og er virk í stjórn Myndlistafélags Fljótsdalshéraðs ásamt því að mála sjálf.
