Tökulið Clooney sótt
Boeing 757 þota lenti á Egilstaðaflugvelli í morgun eins og glöggir Héraðsbúar tóku eftir. Þetta er sama vél og kom til landsins með tökulið nýjustu kvikmyndar George Clooney.
Eftir því sem Austurfrétt kemst næst ferðast í kringum 70 manns í vélinni. Var þetta aðallega starfslið með farangur sinn. Enginn tökubúnaður fór um borð í vélina en hann verður sendur með flutningavél frá Keflavíkurflugvelli.
Vélin flaug frá Egilstaðaflugvelli til Stanstead flugvallar í Lundúnum.
Hvorki George Clooney, sem bæði leikstýrir og leikur í myndinni, eða aðrir leikarar fóru um borð í vélina að sögn starfsmanns sem þó litaðist um eftir einhverjum frægum en þekkti engan. Gera má ráð fyrir að þeir ferðist með einkaþotum.
Eins og áður hefur komið fram á vef Austurfréttar hefur verið unnið að tökum á kvikmyndinni „Good Morning, Midnight“ sem er gerð eftir samnefndri skáldsögu Lily Brooks-Dalton. Í henni segir frá vísindamanni sem er einn á norðurslóðum og reynir af öllum mætti að ná sambandi við áhöfn geimskutlu sem er að reyna að komast til jarðar.
Með önnur helstu hlutverk í myndinni fara Felicity Jones, Kyle Chandler David Oyelowo og Tiffany Boone. Hún er framleidd fyrir Netflix og verður aðgengileg á efnisveitunni á næsta ári.
Boeng 757 vél tökuliðsins. Mynd úr safni.
