Bræðslunni 2020 aflýst
Lífið • This email address is being protected from spambots. You need JavaScript enabled to view it. • Fyrst birt 25. maí 2020 11:51 • Uppfært 25. maí 2020 11:53
Skipuleggjendur tónlistarhátíðarinnar Bræðslunnar, sem halda átti á Borgarfirði eystra síðustu helgina í júlí, hafa ákveðið að halda hátíðina ekki í ár vegna Covid-19 faraldursins.
Þetta kemur fram í tilkynningu sem skipuleggjendur sendu frá sér í morgun. Þar segir að þótt samkomutakmarkanir séu á undanhaldi telji þeir samfélagslega skyldu sína að aflýsa hátíðinni í ár.
Með því vilji þeir afstýra allri mögulegri smithættu sem falist geti í því að stefna saman fjölda fólks á Borgarfirði.
Þeir hvetja fólk hins vegar til að heimsækja Borgarfjörð í sumar og nýta meðal annars skipulagðar gönguferðir, smærri tónleika sem þar verði og aðra þjónustu.
Að lokum er það ítrekað að ákvörðunin þýði ekki endalok Bræðslunnar, sem fyrst var haldin árið 2005, heldur snúi hátíðin aftur af fullum krafti að ári.
