Helgin; Gleðigangan Hýr halarófa á Seyðisfirði og fleira
„Við erum komin með góða rútínu þannig að undirbúningur gengur vel og allt verður orðið flott á morgun,“ segir Snorri Emilsson, forsprakki og talsmaður gleðigöngunnar Hýr halarófa sem verður á Seyðisfirði á morgun.
Er þetta í fjórða skiptið sem gengið er á Seyðisfirði á sama degi og gleðigangan Reykjavík Pride. „Við byrjum gleðina í Norðurgötunni klukkan tólf á morgun þar sem eitthvað skemmtilegt veðrur í gangi. Við förum svo af stað klukkan tvö á sama tíma og í Reykjavík, göngum hring í bænum og endum aftur í Norðurgötunni. Í kjölfarið verður svo öfugt pubquiz og um kvöldð verður dúndrandi stuð á Kaffi Láru,“ segir Snorri.
Um 200 manns hafa að meðaltali mætt í gönguna á Seyðisfirði. „Það er alltaf einhver vöxtur. Ég held að þetta skipti miklu máli, við fáum í það minnsta alltaf þakkir fyrir, fólk er ánægt með að athygli sé vakin á sjálfsögðum réttindum og fjölbreytileikanum sé fagnað.“
„Pride-flugan“ veðrur til sölu á svæðinu eins og í fyrra. „Þetta er annað árið sem hnýtingarmeistarinn Jón Bragi Gunnarsson hnýtir flugur og gefur okkur til þess að styrkja viðburðinn. Aðeins eru sex eintök í boði og í ár verður það laxafluga í regnbogalitunum.“
Hildur Vala og Jón Ólafsson
Þau Hildur Vala Einarsdóttir og Jón Ólafsson verða með tvenna tónleika á Austurlandi um helgina, annars vegar í Fjarðaborg á Borgarfirði í kvöld og í Havarí í Berufirði annað kvöld. Þar flytja þau lög af sólóplötum sínum auk þess sem eitt og annað gæti slæðst með.
Tour de Ormurinn
Hljóreiðakeppnin Tour de Ormurinn fer fram á Héraði á morgun laugardag. Hér má sjá frétt um hana.
Innsýn í heim Huldu í tali og tónum
Tónlistarkonurnar Helga Kvam og Þórhildur Örvarsdóttir verða með síðsumartónleika annað árið í röð á Eskifirði á sunnudaginn klukkan 17:00. Að þessu sinni flytja þær dagskrá sem helguð er skáldkonunni Huldu. Helga segir hvatann að dagskránni hafa verið að halda minningu skáldkonunnar á lofti. Hér má sjá frétt um tónleikana.
