Svartfugl rokkaður á Tehúsinu í kvöld
Bandaríska tónlistarkonan Amelia Ray mun flytja tónlist sína, sem innblásin er af bók Gunnars Gunnarssonar, Svartfugli, á Tehúsinu á Egilsstöðum í kvöld. Ýmsum öðrum viðburðum í fjórðungnum hefur hins vegar verið frestað vegna viðbragða gegn kórónaveirunni.Heilbrigðisráðherra tilkynnti í morgun að frá og með mánudegi gangi í gildi bann við samkomum þar sem fleiri en 100 manns eða fleiri koma saman. Þá er hvatt til þess að tryggja að hóflegt bil sé á milli gesta og góður aðgangur að hreinlætisvörum.
Tónleikar Ameliu munu hins vegar fara fram eins og auglýst hefur verið klukkan 21:00 á Tehúsinu. Amelia, sem er bandaríks að uppruna, dvaldi í gestaíbúð Skriðuklausturs árið 2008 og heillaðist þá af Svartfugli.
Hún mun í haust senda frá sér plötu, sem innblásin er af sögunni um morðin á Sjöundá og hefur platan fengið nafnið Scenes from an Icelandic Novel. Í gegnum tónlist sína gefur Amelia hverr persónu bókarinnar tækifæri til að segja sína hlið sögunnar.
Ýmsum öðrum viðburðum hefur hins vegar verið frestað. Þar á meðal eru tónleikar Sinfóníuhljómsveitar með gítarleikaranum Svani Vilbergssyni sem halda átti á Eskifirði á sunnudag.
Útdráttur um hreindýraveiðileyfi fer fram í Menntaskólanum á Egilsstöðum á morgun. Bein útsending verður á heimasíðu Umhverfisstofnunar en ekki í boði að fylgjast með á staðnum.
Samkomubannið tekur gildi eftir helgina. Á meðan það er í gildi mun messuhald og þar með vorfermingar. Á meðan verður boðið upp á netútsendingar frá messum. Tvær guðsþjónustur höfðu verið boðaðar á Austurlandi á sunnudag, annars vegar í Vopnafjarðarkirkju, hins vegar Kirkjuselinu í Fellabæ, verða á sínum stað.
Þá hefur Búðin á Borgarfirði tilkynnt að íbúum yfir sextugu, eða í sóttkví, bjóðist að panta vörur símleiðis, skrifa þær í reikning og annað hvort fá þær sendar heim eða sóttar af aðstandendum við búðardyr.
