Norðfjarðargöng: Heilög Barbara á sinn stað í kvöld
Líkneski af heilagri Barböru verður komið fyrir við munna væntanlegra Norðfjarðarganga í kvöld. Barbara verndar þá sem vinna í námum og neðanjarðar samkvæmt kaþólskri trú.Áður en fyrsta haftið var sprengt í göngunum í dag var búið að höggva litla syllu rétt við gangnamunnann Eskifjarðarmegin. Líkneskið var komið á svæðið en eðlilega ekki sett upp fyrr en að lokinni sprengingunni. Von var á kaþólskum presti til að stýra lítilli athöfn þegar líkneskinu yrði komið á sinn stað.
Tékkneska verktakafyrirtækið Metrostav er aðalverktaki ganganna ásamt Suðurverki. Kaþólsk trú er þjóðtrú í Tékklandi.
