Norðfjarðargöng: Vegamótin malbikuð
Vegagerð við ný Norðfjarðargöng er í fullum gangi. Um helgina var lokið við að malbika vegamótin sem tengja Eskifjörð við nýjan Norðfjarðarveg.
Neðra lagið var lagt á síðasta þriðjudag, kantsteinn um eyjar á miðvikudag og efra malbikslagið var lagt á um helgina.
Mesta vinnan síðustu daga hefur verið við vegagerð Eskifjarðarmegin, bæði á nýju leiðinni að göngunum og einnig í tengingu nýja vegarins við þann gamla á leiðinni út í Hólmahálsinn, eins og vegfarendur hafa eflaust orðið varir við. Reynt verður að koma slitlagi á þann kafla fyrir verslunarmannahelgi.
Í jarðgöngunum hafa rafvirkjar unnið af krafti við uppsetningu á strengstigum í loft ganganna, en þeir munu m.a. bera uppi lýsingu ganganna. Einnig er búið að draga út talsvert af strengjum í jörð og undirbúa fyrir uppsetningu ljósaskilta af ýmsum toga á veggjum ganganna.
Á meðfylgjandi myndum má sjá vinnu við malbikun og steypingu kantsteins við nýja tengingu Eskifjarðar við Norðfjarðarveg. Myndir: Verkfræðistofan Hnit
