Bjössi Blöndal kominn í ham: Verður Hrafnkell á Héraði næsti borgarstjóri?
Þau tíðindi bárust úr höfuðborginni í hádeginu að Besti flokkurinn og borgarstjóri hans Jón Gnarr gæfu ekki kost á sér til endurkjörs.Við sama tækifæri var hins vegar tilkynnt um að Sigurður Björn Blöndal, aðstoðarmaður borgarstjórans fráfarandi, gæfi kost á sér í komandi sveitarstjórnarkosningum.
Sá er betur þekktur sem Bjössi Blöndal, fyrrverandi bassaleikari rokkhljómsveitarinnar HAM og hefur af mörgum verið talinn einn helsti heilinn í vinnu Besta flokksins. Hann er sonur Sigurðar Blöndal, fyrrverandi skógræktarstjóra á Hallormsstað og bróðir Sigrúnar Blöndal, bæjarfulltrúa Héraðslistans á Fljótsdalshéraði.
Svo heppilega vill til að kosningamyndbandið fyrir Bjössa í kosningaham er tilbúið og á netinu. Bjössi lék nefnilega í auglýsingum Fljótsdalshéraðs þar sem hann kom fram undir nafninu „Hrafnkell á Héraði."
Auglýsingaherferðin var tilnefnd til íslensku markaðsverðlaunanna og lifir blessunarlega enn góðu lífi á internetinu.
Þá er bara spurning hvort Reykvíkingar taka því ekki fagnandi að baráttan um borgarstjórastólinn verði fyrst og fremst á milli Hrafnkels á Héraði og Dóra frá Ísafirði??
