20 tíma rafmagnsleysi í Fellum
Sex bæir í Fellum á Fljótsdalshéraði eru enn án rafmagns eftir raflína í sveitinni skemmdist í miklu ísingarveðri í gær og fyrradag. Viðgerðarflokkur var að til klukkan tvö í nótt en samt tókst ekki að koma rafmagni á bæina.Rafmagnslaust var á Krossi, Setbergi, Birnufelli, Meðalnesi, Rauðalæk og Holti í nótt.
Línan til Hreiðarsstaða bilaði fyrst í gærmorgun en viðgerðarmönnum tókst að laga hana. Um klukkan þrjú kom í ljós bilun í línunni að Krossi. Á meðan gert var við hana bilaði að auki fyrir neðan Refsmýri.
Mikil ísing var á raflínunni í gær sem olli því að staurar brotnuðu og línurnar slitnuðu. Viðgerðarmenn voru að til klukkan tvö í nótt en þá þótti fullreynt og þeir kallaðir heim. Aðstæður í gær voru mjög erfiðar, hvassviðri og stöðugt bætti á af blautum, þungum snjó.
Viðgerðarflokkurinn fór aftur af stað um klukkan átta í morgun. Allt kapp er nú lagt á að koma rafmagni á þá bæi sem lengst hafa verið án rafmagns með díselrafstöðvum. Á Krossi fara að verða liðnir 20 tímar án rafmagns.
Fleiri bæir eru nú án rafmagns á meðan viðgerð stendur yfir. Samkvæmt upplýsingum frá svæðisvakt RARIK á Austurlandi er óljóst hve langan tíman viðgerðin tekur en búast má við frekari truflunum í Fellum á meðan.
