Jens Garðar býður sig fram til formanns nýrra landssamtaka í sjávarútvegi
Jens Garðar Helgason, formaður bæjarráðs Fjarðabyggðar, hefur tilkynnt að hann bjóði sig fram til formanns á sameiginlegum aðalfundi Landssambands íslenskra útvegsmanna og Samtaka fiskvinnslustöðva sem haldinn verður í lok mánaðarins. Fyrir fundinum liggur tillaga um sameiningu samtakanna.Þetta kemur fram í tilkynningu sem send var út á vegum LÍÚ í dag. Adolf Guðmundsson, framkvæmdastjóri Gullbergs á Seyðisfirði, tilkynnti í síðasta mánuði að hann hygðist hætta sem formaður LÍU á fundinum. Arnar Sigmundsson úr Vestmannaeyjum er formaður SF.
„Íslenskur sjávarútvegur er nútímaleg, hátæknivædd atvinnugrein í harðri alþjóðlegri samkeppni. Það felast mikil tækifæri í því fyrir sjávarútveginn að sameina fyrirtæki sem starfa að veiðum, vinnslu, sölu- og markaðssetningu sjávarafurða í ein, öflug samtök," er haft eftir Jens í tilkynningunni.
„Við þurfum að horfa til framtíðar, greina sóknarfærin og vinna að eflingu og samkeppnisfærni sjávarútvegsins þjóðinni allri til hagsbóta. Ég vil bjóða fram mína krafta í því starfi sem framundan er og þá reynslu sem ég hef af sjávarútvegsrekstri."
Jens er fæddur og uppalinn á Eskifirði 1976, stúdent frá Menntaskólanum á Akureyri og stundaði nám í viðskiptafræði í Háskóla Íslands 1997 - 2000. Hann hóf störf hjá Fiskimiðum ehf. á Eskifirði, sem sérhæfir sig í útflutningi á fiskimjöli og lýsi, árið 1999.
Jens Garðar tók við starfi framkvæmdastjóra Fiskimiða árið 2001 og gegndi því fram á þetta ár. Hann á þrjú börn, Heklu Björk, Vögg og Thor. Sambýliskona hans er Kristín Lilja Eyglóardóttir, læknir í Gautaborg.
