Góðfúsleg ábending til íbúa: Sjáum margt athyglisvert í ruslinu
Á Facebook-síðu Fljótsdalshéraðs birtist í dag góðfúsleg ábending til íbúa, sem allir geta tekið til sín. Hún hljómar svona:„Að gefnu tilefni er íbúum bent á að kassar undan mandarínum, og aðrir trékassar, eru ekki endurvinnanlegir og eiga því ekki að fara í grænu tunnurnar. Töluvert er af heftum í hverjum mandarínukassa og er því ekki heldur leyfilegt að setja þá í brúnu tunnurnar. Ef íbúar þurfa að losa sig við mandarínukassa þarf því að henda þeim með almennu sorpi í gráu tunnurnar. Hins vegar má finna ýmis not fyrir kassana og spara þannig m.a. plássið í tunnunum.“
„Þetta er bara nákvæmlega svona. Mandarínukassar eiga að fara beint í gráu tunnuna sem er fyrir almennt rusl. Ef að fólk er að henda þessu í grænu tunnurnar þurfum við að handtína þetta út. Allt sorp fer upp á færiband og er flokkað þar í sjö flokka. Mandarínukassar eru ekki í sama flokki og tímarit og pappír.
En við lendum í ýmsu. Við höfum fengið ref, mink og meira að segja gæs upp úr grænu tunnunum. Nefndu það, við sjáum margt athyglisvert,“ segir Viðar Eiríksson, starfsmaður Íslenska gámafélagsins á Egilsstöðum í samtali við Austurfrétt. „Við værum samt þakklátir ef fólk hefði þetta í huga í þessari mandarínutíð sem er framundan,“ segir hann að lokum.
