Rafmagn komið á í Njarðvík og Breiðdalsvík: Ekkert gamanmál þegar húsin kólna
Rafmagn er komið á aftur í Njarðvík en þar höfðu íbúar verið án rafmagns síðan á sunnudagskvöld og á Breiðdalsvík þar sem rafmagnið fór eftir hádegi í gær. Oddviti Breiðdalshrepps segir að gerði verði krafa um að varaaflstöð sé til staðar fyrir svæðið.Rafmagn komst á aftur í Breiðdal klukkan 12:30 í dag en það hafði þá verið úti síðan klukkan 14:00 í gær. Aðalspennir við Ormsstaði í Breiðdal bilaði og fá þurfti annan með flutningabíl úr Reykjavík.
Varaspennar eru ekki tiltækir á Austurlandi, ekki er varaaflstöð á Breiðdalsvík og ekki er færanleg varaaflstöð til staðar í fjórðungnum. Ein slík var á Fáskrúðsfirði en hún var send til Þórshafnar þegar eldsumbrot hófust við Bárðarbungu.
Hákon Hansson, oddviti Breiðdalshrepps, segir Breiðdælinga hafa skilning á að óvæntar bilanir geti komið upp en bagalegt sé að íbúar séu lengi án rafmagns á svæðum þar sem hús eru hituð með rafmagni.
„Þar hlýtur stofnun eins og RARIK að vera með viðbragðsáætlun og jafnvel neyðaráætlun þegar neyðarástand skapast líkt og gerðist í Breiðdal í tæpan sólarhring."
„Það er ekkert gamanmál, þegar hitastig í húsum er komið niður í 10 stig og í morgun þurfti meðal annars að flytja gamlan mann á sjúkrahús vegna ofkælingar. Þar sem hann liggur nú með lungnabólgu."
Takmarkaðar upplýsingar til íbúa
Hann gagnrýnir RARIK fyrir skort á upplýsingum til íbúa. „Það óvenjuleg ráðstöfun að láta íbúana vita af vandamálinu í gegnum útvarp í miðju rafmagnsleysi. Hins vegar réðust sveitarfélagið og björgunarsveitin í að hafa samband við alla íbúa í gærkvöldi, til að þeim væri ljóst hver vandinn væri og var öllum boðin aðstoð ef á þyrfti að halda."
Hann undrast orð Ólafs Birkissonar, deildarstjóra netreksturs RARIK á Austurlandi, sem í samtali við Austurfrétt í morgun benti á að spennarnir væru of dýrir til að liggja með þá á lager.
„Ég undrast að hann skuli svara spurningum blaðamanns með hálfgerðum skætingi. Ég tel að hann ætti frekar að biðja Breiðdælinga afsökunar á ástandinu."
Hann ítrekar að Breiðdælingar fari ekki fram á að spennarnir séu á lager um allt land en hins vegar séu til staðar færanlegar rafstöðvar.
„Við höfum skilning á því að þurft hafi að flytja hana til Þórshafnar í haust, þegar gos í Holuhrauni byrjaði, en RARIK hafði meira en 100 daga til að flytja eina aðra færanlega rafstöð á Austurland, svo hún væri tiltæk þar.
Ef svo hefði verið hefðum við Breiðdælingar fengið rafmagn um klukkan sjö í gærkvöldi í staðinn fyrir hálf eitt í dag," segir Hákon og segir að gerð verði krafa um að framvegis verði slík stöð til staðar á svæðinu.
Íbúar í Njarðvík fengu rafmagn á ný klukkan þrjú í dag en þeir höfðu verið án þess síðan á sunnudagskvöld. Millispennir bilaði í línu á milli Njarðvíkur og Borgarfjarðar.
