RARIK: Von á að aflstöðin verði fljótlega flutt til baka
Fjórar af sex færanlegum varaaflstöðvum RARIK eru staðsettar í Norður-Þingeyjasýslu í dag, þar á meðal sú sem átti að þjóna Austurlandi. Forsvarsmenn RARIK segja ekkert hafa bent til þess við reglubundna skoðun í sumar að spennir við Ormsstaði í Breiðdal myndi gefa sig eins og raunin varð fyrir jól.Hreppsnefnd Breiðdalshrepps hefur þrýst á um úrbætur eftir að rafmagnslaust varð í sveitarfélaginu í tæpan sólarhring tíu dögum fyrir jól þegar aðalspennir í spennistöð við Ormsstaði í Breiðdal gaf sig.
Hreppsnefndin hefur meðal annars farið fram á að varaafl sé til staðar en í haust var færanleg aflstöð, sem þjóna átti Austfjörðum, send frá Fáskrúðsfirði til Þórshafnar vegna hugsanlegs eldgoss og hamfarahlaups.
Tryggvi Haraldsson, forstjóri RARIK, segir í svari við fyrirspurn Austurfréttar að verið sé að „yfirfara“ málin nú og búist sé við að stöðin verði „fljótlega“ flutt til baka. Það verði samt ekki gert nema í samráði við almannavarnadeild ríkislögreglustjóra og Landsnet.
Í svarinu kemur fram að RARIK eigi sex færanlegar varavélar sem samanlagt geti framleitt 4 MW. Ein sé á Suðurlandi, önnur á Sauðárkróki og hinar fjórar í Norður-Þingeyjasýslu. Þá séu til nokkrar minni vélar sem hægt sé að færa til.
Varaaflstöð er ekki lengur til staðar á Breiðdalsvík en RARIK starfrækir þær ekki þar sem afl berst úr tveimur áttum, líkt og í Breiðdal. Í svari við fyrirspurn Austurfréttar ítrekar Tryggvi að það hafi komið mönnum í opna skjöldu þegar spennirinn gaf sig við Ormsstaði.
„Allir aflspennar RARIK eru undir reglubundnu eftirliti og fylgst með ytra ástandi þeirra, eins og annarra eininga í aðveitustöðvum RARIK. Tekin eru olíusýni úr öllum aflspennum á 5 ára fresti til að fylgjast með innra ástand þeirra og sendum við þau sýni til aðila erlendis til rannsóknar.
Þetta var gert við alla aflspenna RARIK á Austurlandi, þar með talinn þennan spenni, á árinu 2014. Ekkert kom í ljós sem benti til þess að ástand spennisins væri ekki eðlilegt.“
Árið 2006 kom í ljós að spennir við Ormsstaði þyrfti að fara í viðhald eftir rúmlega 20 ára þjónustu og kom sá sem bilaði fyrir jól í staðinn.
Hann hafði áður verið í Mývatnssveit og Eyvindará á Fljótsdalshéraði en fór í viðhald áður en hann kom í Breiðdal. Hann er þýskur framleiddur árið 1967 sem telst ekki gamalt fyrir aflspenna, samkvæmt upplýsingum frá RARIK.
„Til samanburðar er meðalaldur þeirra rúmlega 60 aflspenna sem eru í eigu RARIK yfir 30 ár. Spennirinn frá Breiðdal verður nú yfirfarinn og að öllum líkindum lagfærður og tekinn í notkun aftur,“ segir í svari Tryggva.
