Vinna hafin við úttekt á skólastarfi á Fljótsdalshéraði
Vinna er hafin við úttekt á skólastarfi í grunn- og tónlistarskólum á Fljótsdalshéraði. Markmiðið er að fá tillögur að úrbótum í skólastarfi í sveitarfélaginu.Þetta kemur fram í tilkynningu frá oddvitum listanna fjögurra sem sæti eiga í bæjarstjórn Fljótsdalshéraðs.
Samþykkt var í nóvember að ráðast í úttektina en Miðstöð skólaþróunar við Háskólann á Akureyri sér um hana.
Óskað hefur verið eftir þátttöku nemenda, foreldra og starfsmanna í rýnihópum vegna úttektarinnar með það að markmiði að fá sjónarmið þessara hópa varðandi fyrirkomulag skólamála. Rýnihópar munu ræða við úttektaraðila og koma þannig hugmyndum og sjónarmiðum á framfæri.
Í yfirlýsingunni segir að markmiðið með úttektinni sé að móta hugmyndir um framtíðarskipulag skólastarfs í sveitarfélaginu og afla gagna sem nýtast megi við endurskoðun menntastefnu, m.a. með tilliti til nýrrar námskrár.
Fyrirkomulag skólamálanna hafi lítið breyst síðan Norður-Hérað, Austur-Hérað og Fellahreppur sameinuðust í Fljótsdalshérað árið 2004.
Skoða á faglega, félagslega og fjárhagslega þætti skólastarfs og fá heildaryfirsýn yfir þennan málaflokk sem um 55% allra útgjalda sveitarfélagsins er varið til.
Oddvitarnir segja vonir þeirra standa til að úttektin varpi ljósi á möguleika sem kunna að vera í mótun skólastarfs þannig að það þjóni sem best íbúum í sveitarfélaginu, jafnt í dreifbýli sem í þéttbýli.
Niðurstöður úttektarinnar verða kynntar þegar þær liggja fyrir og þá jafnframt ákveðið hvernig unnið verður með það, sem þar kemur fram, í samvinnu við skólasamfélagið.
