Loðnuskipin bíða í röð á Eskifirði
Norsk loðnuveiðiskip bíða nú í biðröð eftir að geta landað á Eskifirði. Sjö skip liggja þar við bryggju í dag og bíða ýmist eftir að geta landað eða þess að brælu á miðunum linni þannig þau geti farið út á ný.Níu norsk skip hafa komið til Eskifjarðar það sem af er vertíðinni með á bilinu 300-1200 tonn. Þar hafa einnig skip Eskju, Aðalsteinn Jónsson og Jón Kjartansson landað og tekið loðnunót.
Eins og Austurfrétt greindi frá í gær hafa norsku skipin landað um 20.000 tonnum á Austfjörðum í vikunni, aðallega á Fáskrúðsfirði og Eskifirði.
Eitt skipanna níu flutti sig inn á Reyðarfjörð eftir löndun en Fonnes lét úr höfn í hádeginu og er á leið á miðin.
Misjafnt er hvort norsku skipin stefna næst á kolmunnakvótann eða landa meiri loðnu sem væntanlega verður landað á Eskifirði.
Þétt skipað í höfninni á Eskifirði. Myndir: Hreggviður Sigurþórsson
