Sigurinn í tæknilegó keppninni til Fjarðabyggðar
Einn + níu, lið Grunnskóla Reyðarfjarðar sigraði í tækni-og hönnunarkeppni grunnskólanema FIRST LEGO League á laugardaginn var. Alls tóku þrjú lið frá grunnskólum Fjarðabyggðar þátt í keppninni í ár, eða frá Grunnskóla Eskifjarðar, Reyðarfjarðar og Fáskrúðsfjarðar.Þá sigraði lið Grunnskóla Fáskrúðsfjarðar í flokknum Besta lausn í hönnun og forritun vélmennis og Nafnlausar, lið Brúarásskóla á Fljótsdalshéraði sigruðu í flokknum Besta rannsóknaverkefnið: Er því óhætt að segja að krökkunum frá Austurlandi hafi gengið að óskum í keppninni.
Með sigrinum tryggði 1 + 9 sér þátttökurétt á heimsmeistaramóti FIRST LEGO League í St. Louis í Bandaríkjunum í vor. Heiti liðsins vísar til þess að í liðinu er einn strákur og níu stelpur.
Alls tóku 18 lið víðs vegar af landinu þátt í keppninni sem fór fram í Háskólabíói. Í hverju liði voru á bilinu 6-10 manns á aldrinum 9-16 ára og voru þátttakendur því hátt í 200 talsins.
Þema keppninnar í ár var „Skóli framtíðarinnar“ og þurftu keppendur meðal annars að forrita vélmenni úr tölvustýrðu Mindstorms-legói.
Þegar stigin í keppninni höfðu verið talin reyndist liðið Einn + níu sigurvegari. Í viðurkenningarskyni fyrir sigurinn hlaut liðið forláta LEGO-bikar og 150 þúsund króna úttekt frá aðalbakhjarli keppninnar, Nýherja, auk áðurnefnds þátttökuréttar í Bandaríkjunum.
Verðlaun voru veitt í eftirfarandi flokkum:
Besta lausn í hönnun og forritun vélmennis: LegóFásk úr Gunnskóla Fáskrúðsfjarðar.
Besta dagbókin: Gemsarnir úr Grunnskóla Hornafjarðar.
Besta rannsóknaverkefnið: Nafnlausar úr Brúarásskóla á Fljótsdalshéraði.
Vélmennakapphlaup: Lið Breiðholtsskóla.
Mynd: liðið 1 + 9 á lokaæfingu fyrir keppnina, sem fram fór í Háskólabíói á laugardaginn.
