Gamla Hoffellið til HB Granda
Hoffell II SU 802, skip Loðnuvinnslunnar, mun halda á loðnuveiðar fyrir HB Granda innan skamms. Skipið hefur lítið verið notað á Fáskrúðsfirði síðan nýtt Hoffell var keypt þangað síðasta sumar.Í tilkynningu frá HB Granda segir að gert sé ráð fyrir að Hoffellið verði komið til veiða seinni part næstu viku.
Skipstjóri verður Magnús Þorvaldsson og 1. stýrimaður Gunnar Gunnarsson. Þeir eru báðir gamalreyndir skipstjórar og hafa sinnt skipstjórn fyrir HB Granda árum saman.
Aflamark HB Granda í loðnu er um 72.000 tonn og eru nú um 55.000 tonn óveidd. Hoffellið mun veiða af þeim kvóta og landa ýmist á Akranesi eða Vopnafirði.
Mynd: Haraldur Bjarnason
