Kallað eftir skjölum kvenna: Hélt mamma dagbók? Var amma skúffuskáld? Eru bréf langömmu í geymslunni?
Nú í ár fagna landsmenn 100 ára afmæli kosningaréttar kvenna. Af því tilefni efna Landsbókasafn Íslands – Háskólabókasafn, Þjóðskjalasafn Íslands og héraðsskjalasöfnin til þjóðarátaks um söfnun á skjölum kvenna og hvetja landsmenn til að afhenda þau á skjalasöfn. Bréf, dagbækur og önnur persónuleg gögn geta veitt innsýn inn í líf einstaklinga og fjölskyldna þeirra en einnig varpa þau ljósi á sögu lands og þjóðar.
Skila sér síður inn í söfnin
Því miður er það staðreynd að skjöl kvenna skila sér síður inn á söfnin en skjöl karla og þykir starfsmönnum safnanna því tilhlýðilegt að fagna 100 ára afmæli kosningaréttar kvenna með því að minna á mikilvægi þessara gagna og hvetja landsmenn til að stuðla að varðveislu þeirra með því að koma þeim í örugga geymslu. Er þar til dæmis átt við bréf, dagbækur, handskrifaðar matreiðslubækur, póstkort, teikningar, ljósmyndir, kvæði, smásögur og ýmsan fróðleik sem vert er að halda upp á, ásamt handritum sem voru í eigu kvenna.
Veita ráðgjöf varðandi frágang og skil
„Héraðsskjalasafn Austfirðinga hefur frá stofnun 1976 tekið við skjölum bæði karla og kvenna sem eru þau skráð á sambærilegan hátt. Meira er þó af skjölum karla og viljum við gjarnan bæta hlut kvenna með þátttöku í þessu landsátaki. Áhugaverðast væri að fá bréf, dagbækur og ljósmyndir en auðvitað erum við tilbúin að skoða allt sem fólk vill afhenda safninu til varanlegrar eignar og varðveislu,“ segir Bára Stefánsdóttir, forstöðumaður og héraðsskjalavörður á Héraðskjalasafni Austfirðinga í samtali við Austurfrétt.
„Opinberum stofnunum er skylt að afhenda skjöl til héraðsskjalasafns en söfnin hafa einnig tekið við einkaskjölum af ýmsu tagi. Því miður hefur mörgum mikilvægum skjölum og heimildum verið hent gegnum tíðina hvort sem um er að ræða skjöl einstaklinga eða félagasamtaka. Stundum er fólk í vafa um hvað á að varðveita og hvað sé merkilegt. Hvetjum við fólk því til að hafa samband við okkur til að fá upplýsingar og ráðgjöf varðandi frágang og skil á gögnunum,“ segir hún að lokum.
