„Borgaryfirvöld hafa sýnt landsbyggðinni fingurinn“
Gunnar Jónsson, formaður bæjarráðs Fljótsdalshéraðs, segir framgöngu borgaryfirvalda í Reykjavík ástæðu þess að bæjarstjórn Fljótdalshéraðs styðji hugmyndir um að skipulag Reykjavíkurflugvallar og annarra alþjóðaflugvalla á Íslandi verði flutt til innanríkisráðherra. Hann segir borgaryfirvöld í Reykjavíkurborg ítrekað hafa „sýnt landsbyggðinni fingurinn“ með gjörðum sínum.„Það er ekki ásættanlegt að framtíð flugvallarins í Vatnsmýri stjórnist af duttlungum þeirra sem hafa meirihluta í borginni hverju sinni,“ sagði Gunnar í samtali við Austurfrétt í dag og ítrekaði mikilvægi flugvallarins fyrir íbúa á landsbyggðinni.
„Þetta er mikið öryggismál fyrir okkur íbúa landsbyggðarinnar. Við þurfum að ná á Landsspítalann og einnig sækja mikið af opinberri þjónustu til Reykjavíkur.“
Gunnar segir borgaryfirvöld í Reykjavík hafa brotið ákveðið heiðursmannasamkomulag um að láta flugvöllinn vera á meðan verið sé að bíða eftir niðurstöðum frá Rögnunefnd. Ekki sé búið að benda á aðrar lausnir varðandi framtíðarstaðsetningu Reykjavíkurflugvallar.
Ennfremur segir Gunnar að borgaryfirvöld hafi haldið flugvellinum í gíslingu og að það hafi komið í veg fyrir eðlilega uppbyggingu á honum. Til að mynda sé flugstöðin gömul og alltof lítil og að óvissa um framtíð flugvallarins komi í veg fyrir samkeppni í innanlandsflugi.
Almennt segist Gunnar þó hlynntur því að sveitarfélögin haldi sínum skipulagsrétti, en að í svona málum krefjist almannaheill þess að „svona hlutir séu í lagi“ og að ríkið grípi inn í. Ekki sé þó fullkomin eining um málið innan bæjarstjórnar Fljótsdalshéraðs. Báðir fulltrúar Héraðslistans, sem mynda meirihluta með Á-listanum og Sjálfstæðisflokki, sátu hjá þegar málið var afgreitt í bæjarstjórn.
