Únglíngarnir í blokkinni: Aukið líf í Miðvangi 6
Eigandi fjölbýlishússins Miðvangs 6 á Egilsstöðum bindur vonir við að aukið líf sé að færast í húsið. Lokið var við húsið árið 2010 en upphaflega stóð til að þar yrðu fyrst og fremst íbúðir fyrir eldri borgara.Nýverið keyptu Eyjólfur Skúlason og Sigrún Bjarnadóttir íbúð á efstu hæð hússins og verða þau unglingarnir í húsinu, en sú kvöð er á íbúðunum að þær eru ætlaðar fólki 55 ára og eldri. Þau munu flytja inn í haust.
Í húsinu eru 22 íbúðir en á neðstu hæðinni er félagsaðstaða eldri borgara og verslanir. Undir húsinu er bílakjallari og geymslur sem tilheyra íbúðunum.
Í sumar og haust verður unnið við að leggja í gólf þeirra íbúða sem óseldar eru og þá verða þær tilbúnar með skömmum fyrirvara fyrir nýja eigendur.
Í tilkynningu frá Nesnúps ehf., eiganda íbúðanna, segir að vonir standi til þess að aukið líf færist í sölu eigna í húsinu en þar kemur fram að fleiri áhugasamir hafi síðustu vikur skoðað eignir í húsinu.
Eyjólfur og Sigrún ásamt Guðgeiri Sigurjónssyni fulltrúa seljanda. Mynd: Aðsend
