Lögreglumenn boða til samstöðufundar
Lögreglumenn víða um land hafa að undanförnu gripið til aðgerða til að vekja athygli á kjarabaráttu sinni. Verkfallsréttur lögreglumanna var afnuminn með lögum árið 1986 og var það þá hluti af samkomulagi milli lögreglumanna og fjármálaráðherra.
Undanfarin ár hefur borið á mikilli óánægju í stéttinni og hefur Landssamband lögreglumanna lýst því yfir að það sé skýlaus krafa þeirra að öðlast verkfallsrétt á ný.
Kjaradeilum lögreglumanna og ríkisins hefur frá árinu 2008 tvívegis verið vísað í gerðardóm og hafa lögreglumenn ekki verið sáttir við niðurstöðu þeirra mála.
Kjarasamningar lögreglumanna hafa verið lausir frá 1. maí sl. og er aukinn hiti að færast í lögreglumenn sem hafa að undanförnu ítrekað vakið athygli á stöðunni með ýmsum hætti.
Lögreglumenn á Austurlandi hafa nú boðað til félags- og samstöðufundar sem haldinn verður í kaffihorninu í Nettó á Egilsstöðum kl. 13 í dag. Eina dagskrármálið eru kjaramál lögreglumanna.
Búðahnuplarar ættu því að líkindum að velja sér annan tíma til að athafna sig í versluninni.
