Rósa Guðrún: Starfsfólki líður betur á blönduðum vinnustöðum
Íslenskur vinnumarkaður er enn mun kynjaskiptari heldur en gerist annar staðar á Norðurlöndunum. Verulegur halli er enn í stjórnunarstöðum þar sem karlar eru fjlömennari.Þetta kom fram í máli Rósu Guðrúnar Erlingsdóttur, sérfræðings í velferðarráðuneytinu, á landsfundi jafnréttisnefnda sem haldinn var á Egilsstöðum nýverið.
Hún benti á að Íslendingar hefðu lengi verið eftirbátar annarra Norðurlanda á flestum mælikvörðum jafnréttis kynjanna. Heldur hafi þó færst saman síðustu ár. Konur séu nú 44% fulltrúa í sveitarstjórnum og 40% þingmanna.
Vísbendingar eru hins vegar um að þær hætti fyrr en karlarnir. „Óvægin umræða er nýtt form af ofbeldi. Konur veigra sér við að taka þátt."
Enn er þó talsverður munur á vinnumarkaði, bæði hvað varðar stjórnendastöður og laun en aðgerðahópur um launajafnrétti er að störfum og á að skila framkvæmdaáætlun fyrir lok árs 2016.
En það þarf líka að blanda störfum betur. „Starfsfólki líður betur á blönduðum vinnustöðum," sagði Rósa.
Þróunin síðustu ár hefur verið sú að konur hafi fært sig yfir í það sem töldust karlastörf en karlar hafi ekki farið sömu leið á móti. Þeir sjást til dæmis varla í umönnunarstörfum.
„Í dag eru karlar 1% hjúkrunarfræðinga og 1 af 240 leikskólastjórum er karl. Þarna er meðal annars hómófóbía sem takast þarf á við."
