Fer Höttur stigalaus inn í jólafríið?
Körfuknattleikslið Hattar fékk Stjörnuna í heimsókn í íþróttahúsið á Egilsstöðum í gær. Það hefur sáralítið gengið hjá Hetti í vetur en oftar en einu sinni hafa þeir þó verið grátlega nálægt sigri. Liðið vil oft spila vel stóran hluta leiks en hikstar svo á lokamínútunum og það var nákvæmlega það sem gerðist í gærkvöldi.Fyrstu þrír leikhlutarnir voru fínir hjá Hetti en enn og aftur vantar stig frá fleirum en Tobin Carberry sem var stigahæstur Hattarmanna í gær með 26 stig á meðan að aðrir leikmenn liðsins voru með undir 10 stig.
Höttur leiddi leikinn 40-35 í hálfleik og í lok þriðja leikhluta var staðan 56-50 og margir áhorfendur sjálfsagt farnir að sjá fyrir sér fyrsta sigur Hattar.
Svo varð ekki en Höttur hreinlega kastaði frá sér leiknum á fyrstu fimm mínútum fjórða leikhluta og allt í einu var staðan orðin 64-70. Stjarnan bætti í og kláraði leikinn með fimmtán stiga sigri 64-79.
Grátlegt fyrir heimamenn sem spiluðu heilt yfir vel í þrjátíu mínútur.
Hattarmenn eiga eftir að spila tvo leiki í deild fyrir jól. Tveir leikir til að koma í veg fyrir það að enda í jólakettinum.
Næsti heimaleikur Hattar er á morgun, sunnudag klukkan 15:30 gegn Þór Þorlákshöfn í 16 liða úrslitum bikarkeppninnar.
