Stormur í aðsigi: Haldið ykkur heima eftir vinnu
Veðurfræðingur segir von á glórulausum byl á Austurlandi frá því seinni partinn í dag og framundir hádegi á morgun. Úrkoma verður meiri á Austfjörðum en annars staðar á landinu og vindur vægari.„Það er óvenjulegt að minnsti vindur á landinu sé 20-25 m/s," segir Elín Björk Jónasdóttir, veðurfræðingur hjá Veðurstofu Íslands.
Veðurstofan spáir vaxandi austanátt síðdegis en 20-25 m/s með talsverði slyddu, sjókomu eða jafnvel rigningu í kvöld.
„Það verður glórulaus bylur eitthvað fram á nótt og gengur niður seint í nótt eða fyrramálið. Það verður hins vegar áfram vont á fjallvegum fram undir hádegi á morgun," segir Elín.
„Þótt vindurinn sé ekki verstur þarna verður úrkoman hvað mest þarna. Það er viðbúið að það verði mikið kóf á öllum fjallvegum og eins láglendi. Það er von á að verði bullandi ófærð."
Veðurstofan hefur beðið landsmenn um að halda sig heima við eftir klukkan fimm í dag. Eystra er búist við að stormurinn geri vart við sig um og eftir hádegi en lægðin gangi hratt inn milli klukkan 15 og 18.
Morgunvél Flugfélags Íslands lenti á Egilsstöðum klukkan hálf níu í morgun en seinni vélunum tveimur hefur verið aflýst.
Snjóflóðahætta er metin á þriðja stigi af fimm sem er töluverð hætta. Í snjóflóðaspá segir að nokkur óstöðugleiki sé í íslögum í nýsnævi i´Oddsskarði. Þar hafi sést tvö snjóflóð í síðustu viku og þrjú önnur í Norðfirði. „Mikill veikleiki" hafi sést í snjónum í gær.
Veðurspár geri svo ráð fyrir „kolvitlausu veðri" í kvöld og mikilli úrkomu. Þá geti snjóflóðahætta skapast hratt hlémegin við austan áttina í giljum og fjallsbrúnum.
Mynd: Dagur Skírnir Óðinsson