Ætla að loka hringnum fyrir páska
Ný hraðhleðslustöð Orku náttúrunnar (ON) var tekin í notkun á Egilsstöðum í dag. Þrjár slíkar stöðvar varða komnar í gagnið í upphafi nýs árs.Fyrsta hraðhleðslan í fjórðungnum var tekin í notkun á Djúpavogi fyrir tveimur vikum og stöð opnar á Stöðvarfirði á fyrstu dögum nýs árs.
Við opnun stöðvarinnar á Egilsstöðum sagði Bjarni Már Júlíusson, framkvæmdastjóri ON, að verið væri að vinna í því að loka hringnum en fyrirtækið hefur frá 2014 unnið að því að koma upp hleðslustöðvum, eða einfaldlega hlöðum, meðfram þjóðvegi 1.
Í dag var einnig opnuð stöð í Freysnesi og á næstunni koma upp hlöður í Mývatnssveit og Skjöldólfsstöðum á Jökuldal. Þar með verður hringnum lokað.
Bjarni segir að það fari eftir veðri hvenær stöðvarnar tvær koma upp en stefnt sé að því að þær komi fyrir páska.
Bjarni svipti hulunni af stöðunni ásamt Sigrúnu Hólm Þorleifsdóttur, stöðvarstjóra N1 en hlaðan stendur við Söluskálann. Rafbílaeigendurnir Stefán Sigurðsson og Helgi Sigurðsson voru svo fyrstir til að reyna nýju stöðina.
