Átta virk smit meðal Austfirðinga
Átta virk Covid-19 smit eru skráð á Austurlandi, sem er einu fleira en í gær. Það skýrist af mismunandi skráningu gagna sem nú hefur verið leiðrétt.Í gær voru smit sjö talsins en eftir uppfærslu Covid.is í morgun voru þau orðin átta.
Í tilkynningu aðgerðastjórnar almannavarnanefndar Austurlands segir að þetta hafi breyst eftir að skráning hafi verið leiðrétt eftir heimilisfangi. Átta eru því í einangrun í fjórðungnum með virk smit og 26 í sóttkví.
Aðgerðastjórn áréttar mikilvægi þess að upplýsinga og ráða sé leitað hjá heilbrigðisstarfsfólki við Heilbrigðisstofnun Austurlands, eða læknavaktarinnar í síma 1700 ef veikinda verður vart. Helstu einkenni eru hiti, hósti, bein- og vöðvaverkir og þreyta. Sjaldgæfari einkenni eru skert bragð og lyktarskin. Brýnt er þá að halda sig heima og bíða ráðlegginga, eftir atvikum sýnatöku og niðurstöðu hennar.
Þá vekur aðgerðastjórn athygli á aukningu smita undanfarið og mikilvægi þess að allir hugi að eigin smitvörnum, tveggja metra reglu, handþvotti og sprittnotkun.
