Austfirðingar telja sig öruggari en aðra
Íbúar á Austurlandi telja sig öruggari en aðra landsmenn miðað við nýja könnun Ríkislögreglustjóra. Áhyggjur af innbrotum eru hvergi lægri en kynferðisbrot virðast tíðari.82% íbúa á Austurlandi telja sig mjög örugga eina á ferli í sínu byggðarlagi eftir að myrkur er skollið á. Ekkert annað landssvæði nær þar yfir 67%. Enginn í fjórðungnum taldi sig óöruggan.
Svarið snýst hins vegar við þegar spurt er hversu öruggt fólk telji sig í miðborg Reykjavíkur eftir myrkur um helgar, þar eru Austfirðingar óöruggari með sig en aðrir, 80% Austfirðinga upplifa sig óörugga eða mjög óörugga. Almennt telur fólki sig óöruggt á ferli í borginni þá en sú regla gildir að þeir sem búa næst telja sig öruggasta.
Austfirðingar telja umferðarlagabrot þau afbrot sem þeir þurfi helst að hafa áhyggjur af, 42% segjast hafa mestar áhyggjur af umferðarlagabrotum sem er álíka hlutfall og víða á landsbyggðinni.
Austfirðingar hafa minnstar áhyggjur allra af eignaspjöllun, aðeins 2% nefndu þau, 1% þjófnað, 1% kynferðisbrot en 6% önnur afbrot sem var hvergi hærra.
33% Austfirðinga töldu ekkert brot vera vandamál, enginn svarenda úr fjórðungnum hafði áhyggjur af ofbeldi eða innbrotum.
Hvergi annars staðar mældust engar áhyggjur af innbrotum. 65,6% Austfirðinga sagðist aldrei á árinu 2016 hafa haft áhyggjur af innbroti á árinu 2016. Það hlutfall komst hvergi nærri því.
Spurt var hvort viðkomandi hefði orðið fyrir broti árið 2016. Á Austurlandi voru eignaspjöll tíðust, 7% höfðu orðið fyrir þeim. Athygli vekur að 4% sögðust hafa orðið fyrir kynferðisbroti, það hlutfall var hvergi hærra.
3% Austfirðinga höfðu lent í þjófnaði sem var lægsta hlutfallið á landinu og enginn aðspurðra hafði lent í ofbeldisbroti, sem er einstakt. Aðeins 15% Austfirðinga höfðu lent í einhvers konar broti sem var langlægsta hlutfallið.
5% svarenda af Austurlandi sögðust hafa orðið fyrir einhvers konar ofbeldi af hálfu maka, það hlutfall mældist aðeins lægra á Suðurlandi.
Enginn Austfirðinganna hafði orðið fyrir því að af honum væri deilt kynferðislegu myndefni án leyfis eða verið hótað því. Slík brot voru afar fátíð í könnuninni en Austurland var eini fjórðungurinn þar sem enginn hafði orðið fyrir því.
Könnunin var gerð af Félagsvísindastofnun Háskóla Íslands til að kanna reynslu Íslendinga af afbrotum og öryggistilfinningu. Á landsvísu svöruðu 2500 manns könnuninni, þar af voru innan við 100 af Austurlandi. Vikmörk innan svæðisins eru því há.