Banaslys í Heiðarenda
Banaslys varð í Heiðarenda, skammt frá brúnni yfir Jökulsá á Brú skömmu fyrir klukkan fjögur í dag.
Ökumaður jepplings missti stjórn á bíl sínum þannig hann fór út af veginum í bratta og valt nokkrar veltur.
Ökumaðurinn var kona fædd árið 1955. Hún var ein í bílnum. Hún var úrskurðuð látin á staðnum en sjúkralið og lögregla komu frá Egilsstöðum.
Aðstæður voru erfiðar á slysstað, mikil snjókoma, kóf, blindað og hált í krapanum á veginum.
Ekki er unnt að greina frá nafni hinnar látnu að svo stöddu.