Ekkert á Reykjavíkurflugvelli sem hamlar sjúkraflugi
Braut er opin á Reykjavíkurvelli ef nauðsynlega þarf að lenda þar sjúkraflugi, samkvæmt upplýsingum frá Isavia. Ókyrrð er hins vegar yfir landinu sem veldur því að áætlunarflug liggur niðri.Bæði RÚV og Vísir birtu síðdegis í dag fréttir um að báðar brautir Reykjavíkurflugvallar væru lokaðar vegna hliðarvinda með tilvísun í framkvæmdastjóra Mýflugs sem annast sjúkraflug. Norðaustur-suðvesturbraut vallarins, svokölluð neyðarbraut sem lokað var í sumar, væri hins vegar opin.
Guðni Sigurðsson, upplýsinga fulltrúi Isavia, segir þetta ekki rétt. „Vindurinn núna er þannig að það væri fínt að lenda á austur-vestur brautinni. Það er ekkert á Reykjavíkurflugvelli sem hamlar sjúkraflugi núna. Ef það kæmist í lofið þá er brautin klár.“
Viðvörun er hins vegar í gildi fyrir landið vegna ókyrrðar í lofti og þess vegna var öllu áætlunarflugi aflýst eftir kaffi.
Guðni ítrekar enn fremur að það sé ákvörðun flugstjóra og flugfélags hvort farið sé í loftið. Tæknilega sé teljist völlurinn alltaf opinn til lendinga nema flugvélar séu fastar á honum, skurðir í gegnum flugbrautir eða annað slíkt.
