Engin Hollywoodstjarna hefur látið sjá sig í Stuðlagili
Hollywoodstjarnan Will Smith hefur ekki sést enn sem komið er í Stuðlagili eins og fregnir hafa verið um. Raunar telur fólk þar mjög ólíklegt að stjarnan muni láta sjá sig.Þetta kemur fram í máli Stefaníu Katrínar Karlsdóttur eins af eigendum jarðarinnar Grund á Efri Jökuldal.
„Það eru engir frægir á ferðinni hér bara venjulegt fólk,“ segir Stefanía Katrín í samtali við Austurfrétt. „Það er hópur fólks núna niður í gilinu að taka upp það sem virðast vera áhættuatriði í þessari mynd sem Will er að gera.“
Aðspurð um ónæði vegna tökuliðsins, sem telur nokkra tugi, segir Stefanía vissulega svo vera. Svæðinu hafi verið lokað í gær og í dag. Hún hafi því þurft að vísa ferðamönnum frá.
„Það var ekki um neinn fjölda að ræða en við erum enn að fá slæðing af erlendum ferðamönnum í skoðunarferðir.“ segir hún.
Eitt sinn útnefndur valdamesti leikari Hollywood
Will Smith, eða William Conrad Smith jr. eins og hann heitir í raun var ein af stærstu stjörnum Hollywood í kringum aldamótin, Hann hefur aldrei náð fyrri hæðum síðastliðin áratug eða svo.
Will Smith hóf feril sinn sem rappari/hipphoppari í hljómsveitum á borð við DZ Jazzy Jeff & The Fresh Prince og Ready Rock C. Stóra tækifærið kom svo þegar NBC sjónvarpssöðin bauð honum aðalhlutverkið í þáttunum The Fresh Prins of Bel-Air árið 1989. Það sem á eftir kom er þjóðsaga eins og þeir segja í Hollywood..
Eftir nokkur ár fór Will frá NBC og í kvikmyndir. Framinn lét ekki á sér standa. Eftir að hann lék í myndinni Bad Boys árið 1995 setti Will tvö aðsóknarmet sem seint verða slegin. Hann er eini leikarinn í sögunni sem hefur leikið í átta myndum i röð sem allar hafa skilað yfir 100 milljónum dollara, nær 14 milljörðum króna, hver í miðasölu á heimamarkaði (Bandaríkjunum). Á alþjóðamarkaðinum eru þetta ellefu myndir í röð sem hafa skilað inn yfir 150 milljónum dollara hver. Þetta voru myndir á borð við Muhammed Ali og Men in Black
Sennilega hefur Will Smith náð hátindi ferils síns árið 2007 þegar Newsweek timaritið útnefndi hann valdamesta leikarann í Hollywood. Um svipað leyti sagði Forbes tímaritið að hann væri öruggasta fjárfestingin á kvikmyndamarkaðinum. Eftir það fór hann um árabil að einbeita sér meira að tónlist.
Síðasta stórmynd Will var árið 2012 þegar Men in Black III kom á markaðinn og halaði inn vel yfir 600 milljónir dollara brúttó.
Á síðustu árum hefur Will af og til leikið í kvikmyndum en þær hafa ekki vakið neina sérstaka athygli.
