Erum í betri stöðu en margir aðrir
Björn Ingimarsson bæjarstjóri Fljótsdalshéraðs segir að þeir séu í betri stöðu en mörg önnur sveitarfélög á landinu, sérstaklega á Suðurnesjunum. Það sé þó samdráttur og fyrirsjáanlegt atvinnuleysi í ferðamannageiranum á Fljótsdalshéraði eins og allsstaðar annarsstaðar.„Við höfum alveg haldið sjó hingað til,“ segir Björn í samtali við Austurfrétt. Eins og fram hefur komið er talið að sveitarfélögin á landinu skorti um 33 milljarða kr. til að bæta þann tekjumissi sem COVID hefur valdið.
„Ástandið hefur haft áhrif á tekjusteymið hjá okkur en ekki alvarlega hingað til,“ segir Björn. „Við reiknuðum með 5% tekjuaukningu í skatttekjum í ár en hún verður sennilega nær 3 til 4%.“
Fram kemur í máli Björns að það geri ástandið verra að töluvert verður dregið úr framlögum frá Jöfnunarsjóði sveitarfélaga í ár miðað við í fyrra. Það bætir ekki stöðuna að sögn hans.
Framundan eru fundir sveitarfélaganna og ríkisstjórnarinnar í þessari viku og þar ættu málin að skýrast eitthvað.
