Fjarðabyggð stendur sig miður vel að leita sjónarmiða íbúa sinna
Nálega helmingur þátttakenda úr Fjarðabyggð sem þátt tók í nýútkominni Íbúakönnun landshlutanna telur að sveitarfélagið standi sig illa í að leita eftir sjónarmiðum eða skoðunum íbúa sinna. Hlutfall þátttakenda á þessari skoðun á Héraði og í Norður-Múlasýslu er um 34 prósent.
Íbúakönnun landshlutanna var nú framkvæmd í annað skipti á öllu landinu en að henni standa landshlutafélögin utan höfuðborgarsvæðisins ásamt Byggðastofnun. Könnunin er byggð á tilviljunarkenndu úrtaki en þátttakendur nú voru 11.500 talsins. Þar eru íbúar spurður út í margvísleg málefni eins og hamingju, þjónustu og almenn búsetuskilyrði.
Ein spurningin varðaði íbúalýðræði og hvort íbúum finndist raddar sínar heyrast í stjórnkerfinu á hverjum stað. 48% svarenda í Fjarðabyggð sögðu sveitarfélagið standa sig mjög eða frekar illa að leita sjónarmiða eða skoðana íbúa sinna. Aðeins 12% voru á þeirri skoðun sveitarfélagið stæði sig mjög eða frekar vel. Fjarðabyggð kemur næstverst út hvað þetta varðar í könnuninni nú.
Á Héraði og í Norður-Múlasýslu voru 34% þátttakenda sem sögðu sín sveitarfélög standa sig mjög eða frekar illa hvað íbúalýðræðið varðaði meðan 19% voru á öndverðri skoðun.
