Forstjóri Norrænu segir ástandið skelfilegt
Linda Björk Gunnlaugsdóttir forstjóri Norrænu segir að ástandið sé skelfilegt hjá þeim hvað farþegafjölda varðar í kjölfar hinna hertu COVID reglna og hvernig sumir farþeganna þurfa að bregðast við. Aðeins eru 190 farþegar um borð í ferjunni á leið til Íslands og fækkar sennilega í Færeyjum. Á sama tíma í fyrra voru þetta að jafnaði 1.100 til 1.300 farþegar sem komu í hverri ferð yfir sumarið. Ferjan kemur á morgun, fimmtudag, til Seyðisfjarðar.„Það var mjög stuttur fyrirvari gefinn á þessum hertu reglum og frá því að þær voru tilkynntar síðastliðinn föstudag er fjöldi farþega búinn að afbóka sig. Norræna er sem stendur í Færeyjum og sennilega munu margir sem ætluðu til Íslands snúa við þar og koma ekki,“ segir Linda í samtali við Austurfrétt. „Það er gagnrýnivert hve skammur fyrirvari var gefinn með þessar reglur af hálfu stjórnvalda.“
Hvað sóttkví varðar segir Linda að Norræna lendi ekki í að útvega farþegum pláss. „Flestir farþegana eru á eigin vegum og þurfa að sjá um sína sóttkví sjálfir,“ segir Linda. „En fyrir þá sem eru með húsbíla er þetta mjög snúið. Þeir mega ekki vera á tjaldstæðum og ekki nota almenningssalerni. Þannig að þeir verða að koma sér eitthvert annað.“
Fram kemur í máli Lindu að þau hjá Norrænu hafi verið hóflega bjartsýn á sumarið framan af. Þannig hafi að jafnaði verið 600 til 800 farþegar í hverri ferð í júní. Nú eru þeir eins og fyrr segir 190 talsins. Linda segir að þau viti ekki fyrr en í kvöld hve margir af þessum 190 muni stoppa í Færeyjum og snúa aftur til Danmerkur í stað þess að koma til Seyðisfjarðar.
Aðspurð um hvort þetta ástand hafi einhver áhrif á áætlun Norrænu segir Linda svo ekki vera. „Vöruflutningar hafa ætíð verið uppistaðan í siglingum okkar yfir veturinn þannig að áætlun okkar stenst eftir sem áður,“ segir Linda.
