Hið einstaka gistiheimili Kirkjubær á Stöðvarfirði á sölulista
Ekki á hverjum degi sem gömul afhelguð kirkja á Austurlandi dettur inn á söluskrá fasteignasölu. Það þó raunin með gömlu kirkjuna á Stöðvarfirði sem mörg síðustu ár hefur verið rekin sem gistiheimilið Kirkjubær með ágætum árangri.
Gamla kirkja bæjarbúa lauk hlutverki sínu fyrir alllöngu síðan en sú stendur hátt í byggðinni við Fjarðarbraut með sérdeilis fínt útsýni út fjörðinn.
Athygli vakti á sínum tíma þegar þessari hartnær 100 ára gömlu kirkjubyggingu var breytt í gistiheimili en kirkjan var byggð árið 1925 og vantar því aðeins eitt ár í aldarafmælið.
Kirkjuhúsið er lítið eða aðeins 69 m² en innandyra í dag er gistipláss fyrir allt að 10 manns þrátt fyrir smæðina. Þórdís Pála Reynisdóttir hjá LF fasteignasölu/Lindin fasteignir segir ýmsa möguleika til staðar fyrir áhugasama um eignina. Hún gæti vel nýst sem sumarhús eða jafnvel heilsárshús en húsnæðisskortur hefur verið viðvarandi á Stöðvarfirði um langa hríð.
„Rekstur gistihússins hefur gengið ágætlega gegnum tíðina en helsta ástæða þess að húsið er nú á sölu er að eigendurnir eru svona að komast á aldur ef svo má að orði komast. Þarna hefur margt verið lagfært og betrumbætt gegnum árin og ýmsir möguleikar til staðar enda stendur kirkjan á eignarlóð fyrir utan allt annað. Það hafa þegar verið viðbrögð við þessari auglýsingu hjá okkur og viðræður í gangi en eigendurnir hafa óskað tilboða í húsið.“
Kirkjubær vart fyrr kominn á sölulista en áhugasamir höfðu samband og forvitnuðust um þessa sérstöku eign. Mynd LF Fasteignasala
