Íhuga þrjár varmadæluleiðir fyrir Seyðisfjörð
Af hálfu HEF-veitna er nú verið að rýna í hvað framtíðarorkuverð gæti orðið fyrir fjarvarmaveitur auk þess sem verið er að kanna hvort Orkustofnun geti fjármagnað hluta varmadæluvæðingar fyrir Seyðfirðinga.
Sérstakur vinnuhópur HEF-veitna er að störfum vegna þessa en RARIK, sem rekið hefur fjarvarmadælu í firðinum lengi vel hyggst hætta því á þessu ári enda mikið tap verið samfara þeim rekstri um margra ára skeið.
Rannsóknir HEF síðustu vikurnar beinast aðallega að þremur leiðum: miðlægri varmadælu, varmadælum í hvert hús bæjarins ellegar blandaða leið af þessu tvennu sem mun kosta að núverandi dreifikerfi verði áfram nýtt að hluta til.
Á síðasta fundi stjórnar HEF kom fram að fyrstu niðurstöður rannsókna hópsins benda til að sverleiki lagna dreifikerfis á Seyðisfirði beri ekki minna hitafall en 35 til 40°C. Það merkir að ekki er hægt að nota hefðbundar loft-í- vatn varmadælur með núverandi dreifikerfi án þess að hækka framrásarhitastig veitunnar með rafhitun eða viðarperlum. Hinir möguleikarnir kalla ekki á endurnýjun núverandi dreifikerfis nema að hluta til.
Starfshópurinn reynir nú að því að greina raforkuverðið til fjarvarmaveitu á Seyðisfirði langt fram í tímann og þær upplýsingar verða lagðar fyrir stjórn á næsta fundi sem tekur málið fyrir á ný áður en möguleikarnir í stöðunni verða svo kynntir íbúum bæjarins.
