Jódís á þing í lokatölunum
Austfirðingar munu eiga tvo fulltrúa á nýkjörnu Alþingi, Líneik Önnu Sævarsdóttur úr Framsóknarflokki og Jódísi Skúladóttur úr Vinstrihreyfingunni – grænu framboði. Þingsæti Jódísar var ekki tryggt fyrr en í lokatölunum.Norðausturkjördæmi varð síðast til að skila af sér lokatölum klukkan kortér yfir níu í morgun.
Frambjóðendur úr Viðreisn, Pírötum, Samfylkingu og Sjálfstæðisflokki, auk Jódísar, höfðu skipst á jöfnunarþingsæti kjördæmisins í gegnum nóttina. Í lokatölunum kom í ljós að það varð Jódísar.
Framsóknarflokkurinn kom best út í kjördæminu, fékk 25,6% og þrjá þingmenn: Ingibjörgu Ólöfu Isaksen, Líneik Önnu og Þórarinn Inga Pétursson. Fyrir fjórum árum fékk flokkurinn 14,3% og tvo þingmenn.
Sjálfstæðisflokkurinn fékk 18,5% og tvo þingmenn: Njál Trausta Friðbertsson og Berglindi Ósk Guðmundsdóttur. Síðast fékk flokkurinn 20,3% og tvo fulltrúa.
Vinstri græn frá 12,9% og auk Jódísar Bjarkey Olsen Gunnarsdóttur á þing. Fylgistapið í kjördæminu er mikið, úr 19,9%.
Samfylkingin tapar einnig smá fylgi, fær 10,5% nú en 13,9% 2017. Formaður flokksins, Logi Einarsson, heldur þingsæti sínu en flokkurinn tapar þingmanni í kjördæminu. Hann fékk jöfnunarsætið síðast.
Fylgi Miðflokksins helmingast, fer úr 18,6 í 8,9%. Það verður til þess að Anna Kolbrún Árnadóttir fellur af þingi en Sigmundur Davíð Gunnlaugsson heldur sínu sæti.
Flokkur fólksins tekur stökk, fær 8,6% nú en fékk 4,3% síðast. Það tryggir Jakob Frímann Magnússon á þing.
Aðrir flokkar koma fá ekki þingmann í kjördæminu. Viðreisn fær 5,4% nú en fékk 2,1% síðast. Píratar eru í 5,3% samanborið við 5,5% 2017. Frjálslyndi lýðræðisflokkurinn fær 0,3.
Alls voru atkvæðin 24.180. Auðir seðlar voru 596 og ógildir 48. Þeir eru ívið færri en síðast. Kjörsókn var 80,9% en 82,4% síðast.