Lögreglan hvetur ferðaþjónustuaðila til að leiðbeina ferðamönnum
Lögreglan á Austurlandi beinir því til ferðaþjónustuaðila að aðstoða erlenda ferðamenn til að leita upplýsingar um færð og veður. Flest útköll lögreglunnar undanfarnar tvær vikur hafa tengst ófærð.Þetta kemur fram í dagbók lögreglunnar. Þar segir að aðstoðarbeiðnir hafi verið fyrirferðamestar og ferðamenn lent í töluverðum vandræðum bæði á fjallvegum og láglendi.
Þá hafi borið á því að lokanir fjallvega hafi ekki verið virtar og þurft aðstoð björgunarsveita og annarra til að ná fólki og farartækjum þaðan aftur. Í fréttum hefur verið sagt frá ferðamönnum sem lögðu á Breiðdalsheiði þrátt fyrir lokunarskilti á jóladag.
Brýnt er fyrir fólki að kanna vel veðurspá og færð á vegum áður en farið er í ferðalög.
Þá beinir lögreglan því til foreldra og forráðamanna að hafa í huga útivistartíma barna og unglinga auk þess að brýna fyrir þeim aðgát í umgengni við flugelda.
Af öðrum verkefnum lögreglunnar er nefnt að tveir ökumenn hafi verið teknir fyrir of hraðan akstur.