Meiri makríll fyrir austan landið en í fyrra
Bráðbirgða niðurstöður sýna að magn makríls í íslenskri landhelgi er meira en sumarið 2020 en mun minna en áratuginn þar á undan. Makríll hefur áberandi meiri útbreiðslu fyrir austan landið en sumarið 2020 en þéttleikinn er lítill.Þetta kemur fram á vefsíðu Hafrannsóknarastofunnar en rannsóknaskipið Árni Friðriksson er komið í höfn eftir að hafa lokið þátttöku í árlegum uppsjávarvistkerfisleiðangri í Norðurhöfum að sumarlagi sem hófst 5. júlí.
Í leiðangrinum var farið í kringum landið. Það voru teknar 64 togstöðvar og sigldar voru um 4300 sjómílur eða 8 þúsund km. Þá voru gerðar sjómælingar og teknir átuháfar á flestum togstöðvum.
„Í leiðangrinum var rannsökuð útbreiðsla og þéttleiki makríls, síldar og kolmunna í íslenskri landhelgi að undanskildum suðaustur hluta hennar sem Færeyingar og Norðmenn rannsökuðu. Líkt og undanfarin ár veiddist norsk-íslensk vorgotssíld á flestum togstöðvum fyrir norðan og austan landið og íslensk sumargotssílds veiddist á landgrunninu fyrir sunnan og vestan landið,“ segir m.a. á vefsíðunni.
„Gögn frá skipunum fimm sem taka þátt í leiðangrinum verða tekin saman og greind upp úr miðjum ágúst og niðurstöður þeirrar vinnu síðan kynntar í lok ágúst.“