Njáll Trausti oftast strikaður út
Njáll Trausti Friðbertsson var sá frambjóðandi í Norðausturkjördæmi sem oftast var strikaður út af kjósendum. Útstrikanir voru hvergi nærri margar til að hafa áhrif á röð frambjóðenda.Reglur um útstrikanir og breytta röð frambjóðenda eru ekki einfaldar en þumalfingurreglan er að fjórðungur kjósenda ákveðins lista þurfi að strika yfir nafn frambjóðanda til að það hafi áhrif á röðun listans.
Njáll Trausti hlaut alls 55 útstrikanir sem eru tæplega 1,3% þeirra sem alls kusu Sjálfstæðisflokksins. Útstrikanirnar komust því hvergi nærri að hafa áhrif á röðina.
Næst flestar útstrikanir fékk Ingibjörg Ólöf Isaksen, oddviti Framsóknarflokks, 28. Þó strikuðu aðeins 0,6% kjósenda listans yfir hennar nafn.
Næst flestar útstrikanir hlutfallslega fékk Anna Kolbrún Árnadóttir, í öðru sæti Miðflokksins, 29 alls eða 1,4%. Þrír aðrir frambjóðendur komust yfir 1% hlutfallið. 1,1% eða 28 kjósendur strikuðu yfir Hildi Jönu Gísladóttur í öðru sæti hjá Samfylkingunni og sama hlutfall, eða 22 kjósendur strikaði yfir nafn Jakobs Frímanns Magnússonar, oddvita Flokks fólksins.
Jafn margir kjósendur, eða 1%, strikaði yfir nafn Þorgríms Sigurðssonar sem var í þriðja sæti Miðflokksins. Þá strikuðu 30 kjósendur, eða 0,98% yfir nafn Bjarkeyjar Olsen Gunnarsdóttur, oddvita VG.
Alls voru breytingar í kjördæminu 339 talsins. Tólf frambjóðendur fengu fleiri en tíu breytingar. Auk þeirra sem þegar hafa verið taldir upp voru það:
Líneik Anna Sævarsdóttir, 2, sæti B-lista, 27 útstrikanir, 0,4%
Berglind Ósk Guðmundsdóttir, 2. sæti D-lista, 11 útstrikanir, 0,3%
Ragnar Sigurðsson, 4. sæti D-lista, 20 útstrikanir, 0,5%
Sigmundur Davíð Gunnlaugsson, 1. sæti M-lista, 13 útstrikanir, 0,6%
Logi Már Einarsson, 1. sæti S-lista, 12 útstrikanir, 0,5%.
