Ný könnun: Tveir flokkar með tvo þingmenn
Sjálfstæðisflokkur og Framsóknarflokkur fá tvo kjördæmakjörna þingmenn í Norðausturkjördæmi samkvæmt nýrri könnun sem birtist í dag.Það var Maskína sem gerði könnunina dagana 22. – 24. september. Notast var við netkönnun í úrtakshóp hjá fyrirtækinu. Alls bárust 5.836 svör þar sem 95% tóku afstöðu til flokkanna.
Tölur úr Norðausturkjördæmi byggja á samtals 643 svörum.
Samkvæmt þeim fengu Framsóknarflokkurinn 23% en Sjálfstæðisflokkurinn 15,8%. Báðir þessir flokkar fá tvo þingmenn. Samkvæmt útreikningum Austurfréttar á könnuninni munar þó afar litlu að þriðji maður B-lista slái út annan mann D-lista.
Fimm flokkar fá einn þingmann. Vinstri hreyfingin – grænt framboð mælist með 12,6% fylgi í kjördæminu, Samfylkingin með 10,7%, Miðflokkurinn 8,8% og Píratar og Sósíalistar með 8,2%.
Viðreisn fær 6,8%, Flokkur fólksins 5,3% og Frjálslyndi lýðræðisflokkurinn 0,7%. Þessir flokkar fá ekki kjördæmakjörinn þingmann.
Norðausturkjördæmi hefur níu kjördæmakjörna þingmenn og eitt jöfnunarþingsæti. Atkvæði á landsvísu spila inn í hvar það lendir. Í greiningu Maskínu er ekki tekið fram hvaða flokkur fær jöfnunarmann í Norðausturkjördæmi.
Litlar sveiflur breyta miklu
Nokkrar breytingar eru í könnuninni frá könnun Morgunblaðsins og MMR sem Austurfrétt greindi frá í morgun og sýna hversu spennandi, eða taugatrekkjandi, kosninganótt er í vændum auk þess að hvert atkvæði skiptir máli. Hafa ber í huga að reikna má með 1-2% skekkju í flestum könnunum.
Í könnum MMR mældist Framsóknarflokkur með þrjá þingmenn. Flokkur mælist með örlítið minna fylgi hjá Maskínu, sem og Sjálfstæðisflokkurinn en þessi litla breyting gerir það að verkum að flokkarnir bítast allt í einu um síðasta kjördæmamanninn.
VG kemur töluvert betur út hjá Maskínu og er orðinn þriðji stærsti flokkurinn. Töluvert er þó að þeirra annar fulltrúi fái þingsæti. Næstur inn á eftir Framsóknarmanninum er efsti maður Viðreisnar, en nokkur munur er þó þeirra á milli. Hann mældist inni hjá MMR.
Sósíalistaflokkurinn kemur betur út en hjá MMR og mælist með þingmann. Miðflokkurinn stendur líka sterkar og er með kjördæmakjörinn mann en var með jöfnunarsætið.
