Opna fyrir athugasemdir vegna frístundabyggðar að Eiðum
Skipulagsstofun opnaði í dag formlega fyrir athugasemdir við þá fyrirhuguðu breytingu á aðalskipulagi Fljótsdalshéraðs að gert verði ráð fyrir 65 hektara svæði undir frístundabyggð við Eiða í framtíðinni.
Eigendur Eiða hafa frá upphafi gert ráð fyrir nýrri frístundabyggð í landinu og upphaflegar áætlanir þeirra gerðu ráð fyrir að þar yrðu skipulagðar allt að 160 frístundalóðir á svæðinu milli byggðakjarnans á staðnum og niður að Lagarfljóti.
Tók sveitarstjórn Múlaþings upphaflega vel í þær tillögur en fallið var þó frá þeim áformum eftir að mikill fjöldi athugasemda, bæði frá stofnunum og einstaklingum, barst Umhverfis- og skipulagsráði Múlaþings í kjölfarið.
Var þá lóðum undir frístundabyggð fækkað úr 160 í 50 lóðir og svæðið minnkað niður í 65 hektara frá því sem áður var. Það er sú skipulagsbreyting sem Skipulagsstofnun auglýsir nú og óskar eftir athugasemdum frá þeim er kunna að hafa eitthvað við málið að athuga.
Í auglýsingu stofnunarinnar er tekið fram að einnig sé bætt við fyrirliggjandi tillögu sérstöku 30 þúsund fermetra efnistökusvæði við Fljótsbakka sem til verksins þarf.
