Sex mánaða fangelsi fyrir hnífsstungu
Héraðsdómur Austurlands hefur dæmt karlmann á fertugsaldri í sex mánaða fangelsi fyrir að stinga annan með hníf. Refsingin er ákveðin með hliðsjón af brotasögu þess dæmda.Atvikið átti sér stað um miðjan nóvember í fyrra en fram kemur í dóminum að maðurinn hafi stungið annan í svefnherbergi á heimili þess síðarnefnda með hníf í fótlegg við hné þannig að af hlaust sex sentímetra langur skurður.
Maðurinn játaði brot sitt skýlaust og sýndi iðrun að mati dómsins. Hann samþykkti einnig bótaskyldu en mótmælti bótakröfu upp á 1,7 milljón króna. Taldi dómari 400.000 krónur hæfilegar bætur auk 200.000 króna fyrir aðstoð lögmanns.
Þá þarf maðurinn að greiða rúmar 700 þúsund krónur í annan málskostnað, þar af skipuðum verjanda sínum 550 þúsund.
Fangelsisrefsingin er ákveðin með hliðsjón af brotaferli mannsins. Í maí 2016 hlaut hann annan sex mánaða fangelsisdóm, þá fyrir rán, líkamsárás og fíkniefnalagabrot á árunum 2014 og 15. Fram kemur að hann hafi ítrekað gerst brotlegur við lög, meðal annars gegn vopnalögum og umferðarlögum á liðnum árum. Þá voru hnífur og hamar í eigum mannsins gerðir upptækir.
