Sigmundur Davíð fluttur að austan
Sigmundur Davíð Gunnlaugsson, fyrrum forsætisráðherra, er fluttur frá Hrafnabjörgum í Jökulsárhlíð á Fljótsdalshéraði þar sem hann hefur haft lögheimili sitt undanfarin fjögur ár. Sigmundur er nú skráður til heimilis á Akureyri.Samkvæmt þjóðskrá er Sigmundur nú skráður til heimilis í Aðalstræti 6 á Akureyri, beint á móti Brynjuís. Það er eitt af elstu húsum Akureyrar, byggt árið 1845.
Þar er einnig lögheimili Miðflokksins, stjórnmálaaflsins sem Sigmundur Davíð stofnaði í haust og veitir nú forustu.
Sigmundur flutti síðast lögheimili sitt fyrir kosningarnar 2013 og hefur síðan verið skráður til heimilis að Hrafnabjörgum 3. Á sama tíma flutti Sigmundur sig í Norðausturkjördæmi.
Sá flutningur hefur löngum verið umdeildur, meðal annars út frá lögum um lögheimili. Skráningin var kærð í haust, meðal annars til sveitarfélagsins Fljótsdalshéraðs, sem taldi það ekki í sínum verkahring að láta málið til sín taka.
Sigmundur Davíð hefur annars að mestu hafst við í Garðabæ undanfarin ár þótt hann hafi haft lögheimili sitt eystra.