Stór aurskriða lokar veginum um Þvottárskriður

Útlit er fyrir að vegurinn um Þvottárskriður verði lokaður fram yfir klukkan fjögur í dag eftir að stór aurskriða féll þar í morgun.

„Hún kom niður um níu leytið. Það er fastur liður hjá okkur að keyra inn í skriðurnar og tékka á grjóthruni. Strákarnir frá okkur sem voru í þeim rúnti horfðu á hana koma niður,“ segir Birgir Árnason, verkstjóri hjá Vegagerðinni á Höfn.

Hann segir skriðuna hafa farið af stað efst í fjallatindunum, farið yfir veginn og út á eitt útsýnisplananna. Hún sé um tveggja metra þykk og 50 metra breið.

Byrjað er að moka skriðunni í burtu en Birgir segir að það verði mikið verk enda skriðan ein „vatnssósa.“ Það taki því væntanlega 5-6 tíma.

Grjóthrun og skriðuföll eru ekki óþekkt á þessum slóðum. Við hliðina eru Hvalnesskriður en þar eru áformaðar varnarframkvæmdir í haust.

Þjóðvegur 1 liggur um skriðurnar og því töluverð umferð um þær. Birgir mildi að enginn hafi verið á ferðinni akkúrat á þeim stað og þeirri stund er skriðan féll. Miklar bílaraðir hafa myndast beggja vegna við og eru starfsmenn Vegagerðarinnar að snúa þeim við.

Talsverð rigning hefur verið á svæðinu en nú er að stytta upp. Ekki er frekari upplýsinga að vænta um færð um skriðurnar fyrr en um klukkan 16:00 í dag.

Mynd: Vegagerðin



Demo

Markmið Austurfréttar er að byggja upp vef sem tengir saman Austfirðinga, sama hvar þeir eru niðurkomnir og flytja fréttir úr þeirra samfélagi.

Samfélagsmiðlar

Þessi síða notar vafrakökur (e. cookies) til þess að upplifun þín af henni sé sem best og til þess að hjálpa okkur að veita þér sem besta þjónustu.