„Það voru frekar skiptar skoðanir innan hreyfingarinnar um þessi skilaboð“
Bjarkey Olsen Gunnarsdóttir, oddviti Vinstri grænna í Norðausturkjördæmi, sendi í gær stöðufærslu frá sér á facebook þar sem hún lét þá skoðun sína í ljós að Vinstri græn ættu ekki erindi í ríkisstjórn ef flokkurinn fengi aðeins 10% fylgi. Ástæða orða Bjarkeyjar var nýr þjóðarpúls Gallups sem birtur var í gær og sýndi að fylgi VG mældist í 10%.
Bjarkey fjarlægði færsluna eftir samtal við Katrínu Jakobsdóttur, formann flokksins, í gær. Katrín sagði í samtali við RÚV að yfirlýsing Bjarkeyjar væri ekki í samræmi við stefnu flokksins. „ Nei það er ekki svo. Í fyrsta lagi er það þannig að við tökum ekki ákvörðun um þetta fyrr en niðurstöður kosninga liggja fyrir. Skoðanakannanir, eins góðar og þær nú eru, ráða ekki för okkar í þessum málum enda má sjá það að þær eru ansi breytilegar dag frá degi þessa dagana og margir flokkar sem liggja þétt saman í aðdraganda kosninga. Þannig að það er alveg óbreytt afstaða okkar í VG. Við erum reiðubúin að mynda ríkisstjórn um þau málefni sem við setjum á oddinn,“ sagði Katrín í samtali við RÚV.
Katrín viðurkenndi einnig að hafa átt í samskiptum við Bjarkeyju í kjölfar yfirlýsingar hennar. „Ég ræddi við Bjarkeyju um færsluna af því að það voru frekar skiptar skoðanir innan hreyfingarinnar um þessi skilaboð,“ sagði Katrín einnig við RÚV.